itr kii uud kii ambar kii saman kii Khushbuu

Category: Malikzada Manzoor Ahmad Poetry

itr kii uud kii ambar kii saman kii Khushbuu
sab se bahatar hai magar us ke badan kii Khushbuu

ko_ii mausam ho havaa leke chalii aatii hai
duur pardes me.n bhii Khaak-e-vatan kii Khushbuu

chand lamhaat me.n kar detii hai subahe.n raushan
naat ki hamd ki puujaa ki bhajan kii Khushbuu

ab to rah rahke jalii laasho.n kii buu aatii hai
pahale aisii to na thii mere chaman kii Khushbuu

is ke har lafz me.n sau phuulo.n kii shaamil hai mahak
shaayarii apanii hai urduu ke dahan kii Khushbuu

jab kabhii gor-e-Gariibaa.N se guzar meraa huaa
mujh ko mahasuus hu_ii apane kafan kii Khushbuu

chaa.Ndanii raat fizaa sard havaa ke jho.nke
haaye vo TuuTate jismo.n kii thakan kii Khushbuu

us ne jab merii taraf Gaur se dekhaa “Manzoor”
bazmr me.n phailii raqiibaanaa jalan kii Khushbuu

na Khauf-e-barq na Khauf-e-sharar lage hai mujhe

Category: Malikzada Manzoor Ahmad Poetry

na Khauf-e-barq na Khauf-e-sharar lage hai mujhe
Khud apane baaG ke phuulo.n se Dar lage hai mujhe

[Khauf=fear; barq=lightning; sharar=spark of fire/ember]

ajiib dard kaa rishtaa hai saarii duniyaa me.n
kahii.n ho jalataa makaa.N apanaa ghar lage hai mujhe

mai.n ek jaam huu.N kis kis ke ho.nTh tak pahu.Nchuu.N
Gazab kii pyaas liye har bashar lage hai mujhe

[jaam=wine goblet; Gazab=very strong; bashar=human being]

taraash letaa huu.N us se bhii aa_iine Manzoor
kisii ke haath kaa patthar agar lage hai mujhe

[taraashanaa=to shape or carve]

www.RomLom.com
www.shoaibonline.com